సెలబ్రిటీల వ్యక్తిగత జీవితం, వారి కదలికలను చిత్రీకరించే క్రమంలో కొందరు ఫొటోగ్రాఫర్లు హద్దులు దాటుతున్న తీరుపై బాలీవుడ్ స్టార్ హీరో సల్మాన్ ఖాన్ తీవ్రంగా మండిపడ్డారు. ముఖ్యంగా హీరోయిన్లను అసభ్యకర రీతిలో, వారి ప్రమేయం లేకుండా వెనుక వైపు నుంచి కెమెరాల్లో బంధించడాన్ని ఆయన తీవ్ర స్థాయిలో తప్పుబట్టారు. ఇటువంటి ప్రవర్తన ఎంతమాత్రం సహించరానిదని, ఇలాంటి పనులకు పాల్పడే వారికి గట్టి బుద్ధి చెప్పాలని నటీనటులకు పిలుపునిచ్చారు.
‘బిగ్ బాస్’ వేదికగా సంచలన వ్యాఖ్యలు’
బిగ్ బాస్ 20′ వీకెండ్ కా వార్ ఎపిసోడ్ సందర్భంగా సల్మాన్ ఖాన్ ఈ అంశంపై బహిరంగంగా స్పందించారు. ఈ రకమైన ఫొటోగ్రఫీ పద్ధతి అత్యంత అసహ్యకరంగా ఉందంటూ తన నిరసనను వ్యక్తం చేశారు. ఆయన మాట్లాడుతూ.. “కొందరు ఫొటోగ్రాఫర్లు హీరోయిన్లు నడుచుకుంటూ వెళ్తున్నప్పుడు వెనుక నుంచి ఫొటోలు తీస్తున్నారు. ఏ నటికీ ఇలాంటి ఫొటోలు నచ్చవు. కొందరు దీన్ని పట్టించుకోకపోవచ్చు, కానీ ఇబ్బందిపడే వారి పరిస్థితి ఏంటి?” అని ఆయన ఘాటుగా ప్రశ్నించారు.
గతం లో నటి సాయి మంజ్రేకర్ ఇలాంటి అనుభవంతో తీవ్ర అసౌకర్యానికి గురైందని, నేహా ధూపియా కూడా ఈ రకమైన ప్రవర్తనపై పోరాటం చేసిందని సల్మాన్ గుర్తుచేశారు. అంతేకాకుండా, తన సొంత మేనకోడలు నడుస్తుండగా కూడా కొందరు వెనుక నుంచి ఫొటోలు తీసి, వాటిని సోషల్ మీడియాలో పోస్ట్ చేస్తూ “ఈమె ఎవరో గుర్తుపట్టండి?” అంటూ అసభ్యకరమైన క్యాప్షన్లు పెట్టారని ఆగ్రహం వ్యక్తం చేశారు. అసలు ఎవరికీ లేని ఈ హక్కును ఫొటోగ్రాఫర్లకు ఎవరు ఇచ్చారని నిలదీశారు.
చెంప పగలగొట్టండి.. సల్మాన్ హెచ్చరిక
బాధిత మహిళలు, నటీనటులు ఇటువంటి సందర్భాల్లో మౌనంగా ఉండకూడదని సల్మాన్ సూచించారు. “ఎక్కడైనా సరే మీ ప్రమేయం లేకుండా, ఇబ్బందికర రీతిలో ఫొటోలు తీస్తే ఊరుకోవద్దు. వెంటనే వెనక్కి తిరిగి వారి చెంప పగలగొట్టండి. మీ అమ్మ లేదా సోదరి ఫొటోలు కూడా ఇలాగే తీసి చూపిస్తారా అని వారిని గట్టిగా ప్రశ్నించండి” అని నటీనటులకు పిలుపునిచ్చారు. సినీ వేడుకలు, పబ్లిక్ ఈవెంట్లలో ఫొటోగ్రాఫర్ల ప్రవర్తన సరిగా ఉండటం లేదని ఆవేదన వ్యక్తం చేశారు.
దాదాపు 90 శాతం మంది మహిళలు, తల్లులైన వారు కూడా ఇలాంటి ఫొటోగ్రఫీని అస్సలు ఇష్టపడరని స్పష్టం చేశారు. ఇటువంటి పనులకు పాల్పడే ఫొటోగ్రాఫర్లు ఎవరో తనకు తెలిస్తే తీవ్ర పరిణామాలు ఉంటాయని సల్మాన్ ఖాన్ హెచ్చరించారు. పాపరాజీ సంస్కృతి మితిమీరుతున్న నేపథ్యంలో, సెలబ్రిటీల గౌరవ మర్యాదలు , ప్రైవసీని కాపాడాలంటూ సల్మాన్ ఖాన్ చేసిన ఈ వ్యాఖ్యలు ప్రస్తుతం సినీ వర్గాల్లోనూ, సోషల్ మీడియాలోనూ తీవ్ర చర్చనీయాంశంగా మారాయి.
